30 दिसंबर, 2010

ओ.एन.वी. कुरुप

फीनिक्स
चिता सूं एकर पाछो जी जाऊंला
फूलां दांईं खोलतो पांख्यां उठूंला ।

म्हैं एक दिव्य अगन री चिणखी हो
जाय पूग्यो किणी मरुथळ री कोख मांय ।
एक मूंगै रै बीज री दोय पतियां दांईं
सोनपांख्यां डोलावतो म्हैं ऊंचै नै उठतो गयो
अगनमुख खोल जागै हिरण्यमय नाळ दांईं
अगन सूं ईज जलमियो ।

तपियोड़ो मिनख एक बाघ दांई
तीर चलावतो, रगत रो तिसो बण्यो
जिण धरती माथै चालै
उण ऊपर म्हैं छींया अर उजास पसरावतो उडूं ।

कांई ठौड़-ठौड़ हरिया बीज उग्या ?
रेत रै चौगान मांय कांई फूल खिल्या ?
कांई मरुस्थळी सूरज-महाराज कानी
उठतै सोनलिया उणियारै राग गावती हबड़ उठी ?

म्हैं उण टोळा सूं उठतो निसफिकर जलमर जद पाछो उड़ूँ
गावतो उड़ूँ,
दोनूं पंख्यां सूं उणपार आभै नै नापतो
आ दौरी साधना चालू रखूं तद
म्हैं झुळस जाउँला |
सगळी पंख्यां री बाटियां जगैला- मौत रै हाथां मांय
अणंतता री आरती करतो
धूपियो बणूंला ।

मरियोड़ा पंखेरू री चिता राख लेय नै आंसुड़ा ढळकाता ओ काळ !
म्हैं चिता सूं एकर पाछो जी जाऊंला
फूलां दांईं खोलतो पांख्यां उठूंला ।
***

थोड़ाक प्रीत रा आखर
एक चिड़कली आपरी पांख्यां सूं
एक पांख म्हारै सामीं न्हाखर उडगी
ओ थूं लेय ले ।
कदळी कुसुम रो पौधो
खुद रै फळ रो दाणो
म्हारै कानी करियो अर कैयो-
थूं इण रो रंग लेय ले ।
एक भूर्ज रूंखड़ो बोल्यो-
म्हारी चिकणी छाल रो
एक छोटो-सो टुकड़ो लेव ।
म्हैं अणजाण पूछ लियो-
कैवो ! म्हैं कवि थनै कांई लिख देवूं ?
पड़ूतर मिल्यो-
लिखै तद छोड़ दियै- थोड़ाक प्रीत रा आखर
म्हांरै वास्तै ।
छेहलो पंखेरू पण ठा नीं कुण सै तीर सूं घायल
म्हारै हियै रै आभै-आंगणै माथै
ड़फ-तडफर हेठै आ पड़ियो !
इण पाठ रै कांठै
कदळी-कुसुम रै पौधा री
बा ठौड़ ई भूलावै मांय कठैई गुमगी !
व्हालो भूर्ज रूंखड़ो ई
किणी सापतै ऊदई खातै
किणी पानै माथै गळग्यो ।
अबै म्हारै पाखती सोनै री पांख कठै ?
स्याही कठै ? कागद कठै ?
अबै म्हैं किणी खातर कांई लिखर जावूं ?
कठैई सूं म्हनै
सुणीजै उथळो-
चिमठी प्रीत रै बदळ
स्सौ कीं पाछो मिल सकै ।
***

अनुसिरजण : नीरज दइया


**************************************************************************
मलयालम कवि : ओ.एन.वी. कुरुप
काव्य पोथ्यां : केई केई पोथ्यां छप्योड़ी । देस विदेस री भासावां मांय अनुवाद ई हुया । भारतीय ज्ञानपीठ सूं सम्मानित कवि ओ.एन.वी. कुरुप मलयालम कविता रा चावा-ठावा नै सिरमौड़ कवि मानीजै । घणा घणा संवेदनसील, क्रांतिकारी जनकवि है |
**************************************************************************



Bookmark and Share

सुनील गंगोपाध्याय

फगत कविता खातर
फगत कविता खातर आ जूण, फगत कविता खातर
कीं खेल-तमासा, फगत कविता खातर मझ सियाळै री सिंझ्यां
जमी-आभो डाकर एकलो म्हारो आवणो, फगत कविता खातर
टकटकी बांध्यै रूपाळै मौन रो एक पळको,
फगत कविता खातर लुगाई, फगत
कविता खातर इत्तो खून-खराबो, बादळां मांय गंगा रो झरणो
फगत मिनख खातर अर घणा दिनां तांई जीवण री लालसा लियां
मिनखां रो इत्तो दुखदाई जीवण, फगत
कविता खातर म्हैं अमरत्व नै फूंतरो गिण्यो ।
***

लंबी कविता री पाण्डुलिपि
इण धरती भेळै रळियोड़ी है एक बीजी धरती
रिंधरोही भेळै बरोबर जुड़ियोड़ी है रिंधरोही
दोफारां री सूनवाड़ मांय दूजो एक सूनवाड़
म्हनै अचरज हुवै
कदैई कदैई तो घणो अचरज हुवै
प्रीत रै उणियारै नै लपेटियां है एक दूजी प्रीत
गैरी सांस रै पाड़ौस मांय है एक घणी गैरी सांस
किणी सिंझ्यां नदी रै कांठै अकलो बैठूं जद
लहरां मांय छींटी-छींटी हुय जावै रगतवरणो ओ आभो
तद एक दूजी नदी रै पाड़ौस मांय
अणगिणती लहरां रो राजा बण नै
एकलो एक मिनख रो बैठणो-
एकलो एक मिनख बण देखूं
पाणी रै मायाजाळ मांय कै एकलो कोनी
है सगळा दुखां री ठारी म्हारै बिछाणा मांय
एक अर बीजो दुख
सगळा तिसळना मारगां रै सिरांथै भटकणो
बिसरा दियो है एक गुगळो दीसण वाळो मारग
म्हनै अचरज हुवै
कदैई कदैई तो घणो अचरज हुवै
***


इणी ढाळै
आपां रा है अचरजगारा दुख
आपां रै जीवण मांय है केई कड़वी खुसियां
महीनै मांय एक-दो बार है आपां रो मरणो
आपां लोग थोड़ाक मर परा पाछा जी जावां
आपां लोग अगोचर प्रीत खातर कंगाल हुय
सामीं आयोड़ी प्रीत नै ठुकरा देवां
आपां सावळ चालता चालता फालतू ई
मोल लेय लेवां दुखां मांय रळियोड़ो सुख,
आपां लोग धरती नै छोड़ जावां परा दसवीं मंजिल माथै
पछै धरती खातर तड़फा तोड़ा
आपां लोग सामीं मंडियां पीसां दांत पण आगलै ई खण
दिखा मुळकता उणियारां रा होकड़ा लियां
मात खायोड़ै मिनखां खातर आपां गैरी सांस छोड़ नै
रोजीना ऐड़ै लोगां रो आंकड़ो भळै बधा लेवां
आपां जागण रै नांव माथै सूवां अर
जागता रैवां सुपनां मांय
आपां हारता हारता बच्या हां अर जीत्योड़ै नै फटकारां
हरेक खण लागै कै इण ढाळै नीं, इण ढाळै नीं
कीं भळै जीवणो है किणी दूजै ढाळै
फेर ई इणी ढाळै अखूट नदी दांई
हांडता-हांडता आगै सरकतो रैवै जीवण … !!
***

लुगाई कै घासफूल
मन री पीड़वां रो रंग बिलू है का बादामी
नदी रै कांठै आज खिल्या है घासफूल
पीळा अर धोळा
कांई उणा पाखती ई है आपां जैड़ो हियो
का है सुपनां रो रूपाळो संसार
एक दिन इण नदी रै कांठै पूग
हरख सूं होवूं ऊजळो
अर फेर कदैई अठै आवूं तो होवूं साव दुखी
मोवणो मूंडो हेठो कर पूछूं -
घासफूल, कांई थे लुगायां दांई हो
दुख देवणा
थे ई तो हो आगार अणथाग आणंद रा ।
***

अनुसिरजण : नीरज दइया


**************************************************************************
बंगाली कवि : सुनील गंगोपाध्याय जलम : 7 सितम्बर1934
कविता संग्रै : केई कविता संग्रह छप्योड़ा । नील लोहितसनातन पाठक,नील उपाध्याय आद केई-केई नांवां सूं लेखन । लगटगै 200 पोथ्यां प्रकासित । प्रसिद्ध कविता-पत्रिका ‘कृत्तिवास’ रा सम्पादक । साहित्य अकादेमी मांय पांच बरस उपाध्यक्ष रैयां पछै 20 फरवरी2008 सूं अध्यक्ष पद रो काम संभाळै ।
**************************************************************************

29 दिसंबर, 2010

रमाकांत रथ

चाणचकै एक दिन
आपां री मुलाकात हुवै
केई बरसां पछै
एक दूजै रै केई केई
टाबर-टाबरियां बिचाळै
बै ही है उण कहाणी रा
जरूरी आगला पानां
जिण मांय हुवै जोड़ा
दोय रूंख का दोय धोरां रा
आपां दोवां री बातां बिचाळै
कठैई सूं एक खोखी रीस आय नै
छींटी-छींटी कर न्हाखै
बां जूनै गीतां री नींद ।
कांई भळै कठैई है सूनवाड़
जठै थूं म्हनै खांच नै लेय जावै
पकड़ म्हारो हाथ
अर थारी फगत एक मुळक हाफी मिटा देवै
म्हारो ललबायरो काल अर
रगतबायरी बच्योड़ी उमर !

खुद ही राख लिया आपां
बै जिका आपां नै देवणां हा एक दूजै नै ।
आज फगत देय सका हा-
आपां एक कप चाय, का
टाबरां नै बिसकुट,
टाबर ई ठा नीं क्यूं
परदेसां मांय सैनिकां री लासां माथै
बादळा दांई बह जावै
सूनै आभै मांय ।
***

पैली मारिया गोली
पैली मारिया गोली म्हारी छ्ती रै डावै-पासी
पछै जीवणै-पासी, पछै ई जे म्हैं नीं मरू
तो राखजो कनपटी माथै
बंदूक री नळी, घोड़ो दाबजो उण पछै
इत्तो करिया पछै ई जे म्हैं नीं मरू
तो जाणजो, स्यात कोनी लिख्योड़ो
थारै करमां मांय कै बणो म्हारा खूनी,
का पछै जिण जागां जोवता हा थे म्हानै
बठै हो ई कोनी म्हैं, हो कठैई दूजी ठौड़ ।

हो तो आ पण सकै कै थे बंदूक असली
बदूंक ही कोनी, ही कोई रमतियां वाळी बदूंक
आ किसी नुंवादी बात है बरसां सूं
कांई आपां कूड़ी-कूड़ी कोनी बणियां
भायला-भायली, दोस्त, दुसमण का भळै किणी नै
कदैई नीं ओळखण वाळा दो आदमी ?   

म्हैं निकळियो कोनी कांई कित्ती बार ई सूरज रो होकड़ो लगार !
थूं ई निकळी कोनी कांई पैर परी सात समंदर री साड़ी !
काळजै रै ऊपरिया कर जात्रा मांय पूग्यो बठै
जठै दुनियां निवड़ै, पाछै घिरतै नै
थूं दीसै इंयां जाणै बगत
थमग्यो है डाक नीं सकै थनै ।
पण अबै ? एक दिन सांच जाणर आपां
जिको कीं करियो, उण रो नामोनिसाण है कठै ?
फेर ई म्हैं जद तांई जीवूंला
इंयां ई चालतओ रैसी, थूं ई इण ढाळै
नीं चलैली तो कठै रैसी ?
घणी बार पक्कायत इत्तो कूड़
लादायां पछै काळजो जरूर फोड़ा पावतो हुसी
पगां कोनी हालता हुवैला, थारी आंगळियां
बंदूक नीं हुयां ई घोड़ै नै दाबतां-दाबतां
चाणचकै थर हुयर रैय जावैला ।

थारो हाथ पकड़ण खातर लांबो करियोड़ो म्हारो हाथ कठैई
गायब हुय जासी, फगत सुणीजैला
अळघै जावतै पगां रा हरफ थारा अर म्हारा,
थारै अर म्हारै रळिज्यै मनां रा,
न्यारा-न्यारा सबदां रा, रेलगाड़ी रै आवा-जावी रा,
होंठां, आंख्यां, तावड़ै, रगत अर इतिहास रा,
देवी, देवतावां रा, भूकंप अर मोगरै रै फूलां रा ।

पछै खेलां कांई ? पण किंयां खेलां ?
बरसां रा बरस बीत्या, कोई किणी नै
प्रीत कर सक्यो कांई ? थनै अर म्हनै
खिड़की सूं देखै हा ऐ तारा
थारै अर म्हारै म्हाली चिणखी
म्हैं निकळियो हो हथगोळो नै भालो लेयर नै,
खोपड़ी नै तलवार लेय नै थूं आवै ही ।

रात चांदणी सूवण री वेळा आपां
जुद्ध-खेतर रै सिरै बिचाळै कानी ढूकता रैया हा
बारम्बर, आपू-आप रा औजार लियां एकलखोरड़ा
एक दूजै माथै भांत-भांत रा बाण चलावतां
सफाखानै मांय कितरी संभाळ करी ।

बो सगळो खेल हो का आपां दोवां री
किसमत ? उण किसमत रै मझ समदर मांय
चाणचकै भाठा हुयग्या हा जहाज मांय आपां
दोय जातरू, कांई करियो अर कांई कोनी करियो
सगळी बातां एक बरोबर मरणै तांई दोवां री
कूड़ी दुसमणी अर कूड़ी प्रीत मांय ।
ओ कांई ? थारी आंख्यां
डबडबाईजी क्यूं ?
सावळ समझा नै आंसू पूंछ देंवतो पण
म्हारी ऐड़ी किसमत हुसी कांई ?
***

अनुसिरजण : नीरज दइया


**************************************************************************
उड़िया कवि : रमाकांत रथ ; जलम : 13 दिसम्बर, 1934
कविता पोथ्या : केते दिनार, अनेक कोठरी, संदिग्ध मृगया, सप्तम ऋतु, श्रीराधा आद खास है । पद्म भूषण, सरला पुरस्कार, साहित्य अकादमी पुरस्कार- 1977, सरस्वती सम्मान तथा कबीर सम्मान आद पुरस्कार सम्मान मिल्योड़ा । उडिसा के वरिष्ठतम आई.ए.एस. अधिकारी रैया अर आप साहित्य अकादेमी रा उपाध्यक्ष (1993-1998) अर अध्यक्ष (1998-2003) पदां माथै ई काम करियो । खंडकाव्य 'श्री राधा' आपरी  घणी चावी पोथी है जिकी भारतीय ज्ञानपीठ कानी सूं प्रकासित हुई अर उण रो राजस्थानी अनुवाद चंदप्रकाश देवल करियो साहित्य अकादेमी सूं छप्यो ।
**************************************************************************

18 दिसंबर, 2010

सुभाष मुखोपाध्याय

अनोखो बगत
ओ एक घणो अनोखो बगत है

जद जूनी नींव
रेत दांई भुरण लागगी
इण अबखै बगत मांय आपां भाई-भाई
छींटी-छींटी हुयर खिंड रैयां हां ।

कुण लुका राखी है
बगलां मांय छुरी
कुण जाणै कुण किण खातर
पाळिया बैठियो है बैर
आपां कोनी जाणा
खुवै माथै हाथ धरतां ई
अबै लागै डर ।

अंधारै मांय सांपां जिसी जीभां
जद करै खुसर-फुसर
तद लागै
कोई आपां नै अदीठ आरी सूं
जाबक चिना-चिना टुकड़ा मांय बंधार रैयो है ।

जद
एकठ मुट्ठी भींचर ऊभा हुवण सूं ई
आपां नै स्सौ कीं मिल सकै हो-
तद
काचर रा बीज बोवतो
एक टुकड़ो धिंगाणै मूंडै मांय दबा
चोरां रो एक टोळो
आपारो स्सौ कीं लियां जावै है !
***

आ जमीन
किणी री कैयोड़ी बात्यां माथै
कोनी म्हनै अबै पतियारो
म्हनै चाइजै पुखता सबूत ।
म्हैं कैयी जिकी बातां माथै
करै कोई पतियारो
म्हैं आ कद चावूं,
अगन मांय
रगत मांय
जुध मांय
सगळा अजमायर देख लो म्हनै ।

इण अंधारै मांय
म्हनै दीसै उणियारा डरावणा -
जिका खुद रै कौल सूं
एक दिन भरमायो खुद म्हनै ।
भलाई हत्या नै बै दावै जिको नांव देवै
जुध नै बै दावै जिका बागा पैरावै
मरण रै पण किणी रूपाळै नांव सूं
कोनी पलटूंला म्हैं ।

सागर सूं हिमाळै तांई
धरती है म्हारै पतियारै री
म्हनै भरमाय नै बात्यां मांय
नीं खोस सकै कोई उण नै ।
***

अनुसिरजण : नीरज दइया


**************************************************************************
बंगाली  कवि : सुभाष मुखोपाध्याय 
जलम : 12 फरवरी, 1919 सरगवास : 8 जुलाई, 2003
कविता-पोथ्यां : केई काव्य संग्रै नै विविध विधावां मांय लेखन प्रकासित जत दुरेई जाय माथै बरस 1963 रो साहित्य अकादेमी पुरस्कार अर बरस 1991 रो ज्ञानपीठ पुरस्कार ।
**************************************************************************

17 दिसंबर, 2010

योसेफ मेकवान

कवि रो मरण
आंगणै मांय
सोनचम्पा री झुक्योड़ी डाळी माथै
सुणीजै बुलबुल रा बोल ।
चौफेर तावड़ो तपै
म्हैं मून इण ढाळै
डूब्यो उण रै गाणै मांय
कै म्हनै म्हारी ई खबर कोनी
कितरा बरसां पछै
म्हैं आं नैणां सूं निरखूं
म्हारै ई गाणो
बन बाग सगळा
जाणै म्हारै अंग-अंग फरूकै…
आ सहर रै वातावरण री कांचळी
जाणै अबार उतरती हुवै…
इत्तै मांय बिचाळै रेडियो चालू हुयग्यो
पाड़ोस रै घर मांय
बां री आवाज सूं
अंतस रो मून तूटग्यो
अर हुयग्यो कवि रो मरण !
***

जळ
कैया करै कै
जळ जीवण है ।
जळ रै आंख कोनी
इणी खातर दावै जठै
बैवै, फिरै, गिरै, झरै ।
जळ रै पग कोनी
इणी खातर दावै जठै
रैवै, ठैरै, चढै, पड़ै ।
जळ रै हाथ कोनी
इणी खातर दावै जठै
पकड़ै, तोड़ै, जकड़ै, मसळै ।
जळ रै दुख कोनी
इणी खातर सगळी जागा
मिलै, चलै, बळै, झुकै ।
कैया करै कै
जळ जीवण है ।
फूटै रूंख मांय, टूटै रूंख मांय
खूटै रूंख मांय, जूझै रूंख मांय
रूंख मांय आखा रा आखा सागर भरिया है
सागर मांय आभा रा आभा पळिया है
रूंख मांय मून रा मून ढळिया है
रूंख मांय जुगां रा जुग मिळिया है ।
जळ बस जळ है ।
फगत जळ
पीवूं, पड़ूं, चाखूं, राखूं
इण रो स्सौ कीं सैवूं
बो स्सौ की झेलू
बो सगळी ठौड़ खिलै
न्यारै-न्यारै रूपां मांय
जूनै रूपां मांय
जळ जीवण है
जळ मरण है
मतलब जळ,
जळ जळ हुय जावै
कैयो जावै
जळ ई जीवण है !
***
अनुसिरजण : नीरज दइया

*******************************************************************
*******
गुजराती कवि : जोसेफ मेकवान  ;  जलम : 9 अक्टूबर, 1935 त्रणोल (आणंद) खेड़ा, गुजरात ; निधन : 28 मार्च, 2010
उपन्यास आंगलियात खातर साहित्य अकादेमी पुरस्कार । उपन्यास, रेखाचित्र, कहानी, निबंध, आलोचना आद री 50 रै नैड़ै पोथ्यां प्रकासित । आंगलियात उपन्यास रो राजस्थानी अनुवाद जेठमल मारू करियो, जिण माथै अनुवाद पुरस्कार मिल्यो ।
**************************************************************************

मंगलेश डबराल

संगतकार
खास गायक रै भाखर जैड़ै भारी सुर रो सागो करती
बा आवाज सुरीली थाकल धूजती पण सागै ही
बो खास गायक रो छोटियो भाई है
का उण रो चेलो
का उपाळो चालर आवणियो दूर रो कोई रिस्तैदार
खास गायक री गरज मांय
बो आपरी गूंज रळावतो आयो है बरसां सूं
गायक जद अंतरै री अबखी तानां री रिंधरोही मांय
गुम जया करै
का खुद री ही सरगम नै डाक
जावै परो भटकतो-भतकतो एक अणहद मांय
तद संगतकार ही स्थाई नै सांभ्या रैवै
जाणै सांवटतो हुवै खास गायक रो लारै रैयो सामान
जाणै उण नै चेतै करांवतो हुवै उण रो बाळपणो
जद बो नौसिखिया हो
तारसप्तक मांय जद बैठण लगयो उण रो गळो
प्रेरणा सागो छोड़ती थकी उमाव रै ढळाव माथै
आवाज सूं राख जिसो कीं पड़तो थको हो जद
तद ई खास गायक नै ढाढस बंधावतो
कठैई सूं चालर आय जावै संगतकार रो सुर
कदैई-कदैई बो इंयां ई कर लेंवतो उण रो सागो
ओ जतावण खातर कै बो कोनी एकेलो
अर ओ कै भळै गायो जाय सकै है
गाइज्योड़ो राग
अर उण री आवाज मांय एक झिझक साफ सुणीजै
का खुद रै सुर नै ऊँचा नीं उठावण री जिकी कोसिस है
इण नै उण री असफळता नीं
इनसानियत समझी जावणी चाइजै
***

थारै मांय
एक लुगाई रै कारणै थनै मिलग्यो एक खुण
थारी ई हुई उडीक

एक लुगाई रै कारणै थनै दीख्यो आभो
अर उण मांय विचरतो चिड़कल्यां रो संसार

एक लुगाई रै कारणै थूं अचरज करियो बारम्बार
थारी देही कोई गई अळी

एक लुगाई रै कारणै थारो मारग अंधारा सूं बचग्यो
रोसणी दीसी अठी-उठी

एक लुगाई रै कारणै एक लुगाई
च्योड़ी रैयी थारै मांय ।
***

सहर
म्हैं सहर नै देख्यो
अर मुळक्यो
बठै कोई किंयां रैवास कर सकै
आ ठाह करण नै गयो हो
अर पूठो कोनी बावड़ियो ।
***

कविता
कविता आखै दिन रै थाकैलै जैड़ी ही
अर रात मांय नींद जैड़ी
दिनूगै पूछियो म्हनै
कांई थूं जीमर सूतो रात नै !
***

सबद
थोड़ाक सबद चीखै
थोड़ाक गाभा उतार
घुस जावै इतिहास मांय
थोड़ाक रैय जावै मून ।
***
अनुसिरजण : नीरज दइया

*******************************************************************
हिंदी कवि : मंगलेश डबराल ; जलम : 16 मई, 1948
कविता पोथ्यां : पहाड़ पर लालटेन, घर का रास्ता, हम जो देखते हैं, आवाज भी एक जगह । पहल सम्मान, ओमप्रकाश स्मृति सम्मान, श्रीकान्त वर्मा पुरस्कार अर "हम जो देखते हैं" खातर साहित्य अकादमी पुरस्कार । पूर्वग्रह, जनसत्ता, सहारा समय, नेशनल बुक ट्रस्ट आद मांय कारज करियो ।
*******************************************************************